Partypolitiek nie die oplossing nie

Verkiesing is vry maar nie regverdig


Augustus 1, 2016 deur Flip Buys

Die komende verkiesing behoort administratief vry te wees, maar dis nie polities regverdig nie. Die rede hiervoor is die ANC se” tienpunt koopstrategie”, waarmee hulle die tien belangrikste politieke markte gekoöpteer het. Dis die hoofrede dat die ANC steeds meerderheidsteun het, al regeer hulle die land so swak. Die party het sy verskillende magsbasisse nog altyd saamgehou deur elkeen se steun met beloftes en bevoordeling te koöpteer. Hierdie “koöptasie”-strategie se prys raak nou so hoog dat die land dit nie meer kan bekostig nie.

Maar hoe het hulle dit reggekry? Eerstens is die swart elite se steun verseker deur bemagtigingstransaksies wat talle kitsmiljoenêrs geskep het. Tweedens het “rastellende aksie” ’n ‘politieke’ swart middelklas geskep wat die ANC met hulle stemme bedank. Derdens is miljoene armes se steun vasgesement met die grootste welsynstelsel in die ontwikkelende wêreld. Vierdens is die sosialistiese blok se steun verseker deur die alliansie met Cosatu en die SAKP, en die opneem van hulle leiersfigure en beleidsrigtings in die regering. Vyfdens is die Afrikaniste, danksy die ANC se klem op ras, lojaal aan die party, terwyl die tradisionele blok sesdens ingetrek is deur die opname van hulle leiers in die party en die erkenning en vergoeding van sowat 5 000 tradisionele leiers. Die sewende stap was om die swart jeug se steun te verkry deur die hoë profiel wat aan die ANC Jeugliga verleen is, en die opneem van hulle leiers in die regering.

Oorheersing kamoefleer as demokrasie

Die agtste stap was die ANC se minder suksesvolle poging om die ou magsorde deur die inlywing van die NP in te trek. Met die negende stap is die wit sakelui se samewerking verkry deurdat die ekonomiese beleid ruimte vir privaatbesigheid gemaak het, in ruil vir die ondersteuning van ANC-beleidsrigtings soos rasseverteenwoordigendheid. Die tiende stap was om Liberale elitegroepe soos die media en akademici se steun aan die post-’94 orde te verseker deur die liberale grondwet en demokratiese bestel. Om hierdie almal-insluitende strategie af te rond, is die breë bevolking se lojaliteit vassement deur die stelsel deur middel van die staatsmedia en skoolleerplanne te regverdig. Om die ANC se oorheersing oor alle magshefbome te verskans, is ‘n Staatsideologie van Transformasie ontwikkel. Só is die ANC-regering se mag oor alle sektore van die samelewing deur Kader ontplooiing en “Afrikaan oorheersing” verseker. Die gewildheid van ANC-leiers soos Nelson Mandela het gehelp om die party se beeld onder alle bevolkingsgroepe te verbeter, en so die eenparty oorheersde stelsel as populêre demokrasie te kamoefleer.

Onregverdig

Hierdie “koopstrategie” met belastingbetalers se geld, is die rede waarom die verkiesing moontlik nog vry is, maar beslis nie meer regverdig nie. Die uitslae sal wys of die ANC se swak staatsbestuur, ideologiese en persoonlike verskille, onvervulde beloftes en teleurgestelde verwagtings – ‘n bepalende invloed op die ANC se steun het. As hulle baie steun verloor, is die vraag of hulle dan kan en beter gaan regeer, en of hulle staatsmag gaan misbruik om aan die bewind te probeer vasklou?

Afrikanerplan

Die vraag is waar dit Afrikaners polities gesproke laat? Natuurlik moet minderheidsgroepe alle middele gebruik om hulle belange te bevorder, ook die politiek. Maar dit kan weens die getalleverhoudings in die land nie ‘n oplossing wees nie. Afrikaners “weeg” meer as wat hulle tel, weens ons vlakke van opleiding, entrepreneurskap en selfdoenvermoë. Ons kan stem vir bepaalde partye, maar kan ons steun ruil vir die party wat ons die beste voordeel bied. Daarom bly die beste plan vir Afrikaners om onsself in ‘n netwerk van sterk selfhelporganisasies te organiseer, en daarmee ‘n toekoms te skep waarin ons blywend vry, veilig en voorspoedig kan wees. Kom ons dus kennis van al die politieke ontwikkelings, maar fokus in hoofsaak op die ontwikkeling en uitvoering van ‘n lewensvatbare toekomsplan wat ‘n uitweg uit die huidige doodloopstraat kan bied. Met ons Helpmekaar 2020 bouplan werk ons vir die volgende geslag, nie die volgende verkiesing nie.