Black racism complaints ignored (wb)

Julie 11, 2016 deur Annelise

AfriForum het die Suid-Afrikaanse Menseregtekommissie (SAMRK) in ’n ope brief versoek om terugvoer te gee oor al die sake waarby die SAMRK op eie inisiatief betrokke geraak het, asook die vordering met daardie sake se ondersoeke. Bykomend het dié burgerregte-waghond verder ook ’n opsommende verslag versoek van al die klagtes wat die SAMRK ontvang het ten opsigte van haatspraak en aanhitsing tot moord op ’n rassegrondslag.

Dit volg nadat AfriForum op 31 Julie 2015 ’n skrywe aan die SAMRK gerig het omdat dit vir die burgerregte-organisasie voorkom asof dié menseregtekommissie selektief is in die sake waarby hulle uit eie oorweging betrokke raak. Die SAMRK het AfriForum verseker dat sy waarneming vals is.

Die SAMRK is onlangs deur die media gevra waarom daar geen ondersoek gedoen is na die rassistiese uitlatings van ene Palesa Sotjifa op sosiale media nie. Sotjifa het na bewering herhaaldelik genoem dat wit mense vermoor moet word. Die SAMRK het op medianavrae geantwoord dat die kommissie geen saak teen Sotjifa ondersoek nie aangesien niemand ’n klag teen haar ingedien het nie.

“Op grond van hierdie waarneming, wat op mediaberigte gebaseer is, kan ons nie anders as om tot die gevolgtrekking te kom nie dat die SAMRK steeds met selektiewe vervolging besig is, ongeag vroeëre versekerings aan AfriForum dat dit nie die geval is nie,” sê Ernst Roets, adjunk- uitvoerende hoof van AfriForum.

AfriForum behou die reg voor om alternatiewe regsopsies te oorweeg indien die SAMRK se reaksie nie bevredigend is nie.